A Squire's Training

And as lordes sonnes bene sette, at four yere age,
To scole to lerne the doctryne of letture,
And after at sex to have thaym in language,
And sitte at mete semely in all nurture;
At ten and twelve to revelle in thair cure,
To daunse and synge, and speke of gentelnesse;
At fourtene yere they shalle to felde I sure,
At hunte the dere, and catch an hardynesse.

For dere to hunte and slea, and se them blede,
Ane hardyment gyfffith to his corage,
And also in his wytte to takyth hede
Ymagyninge to take thaym at avauntage.
At sextene yere to werray and to wage,
To juste and ryde, and castels to assayle,
To scarmyse als, and make sykur courage,
And sette his wache for perile nocturnayle;

And every day his armure to assay
In fete of armes with some of his meyne,
His might to preve, and what that he do may
Iff that we were in such a jupertee
Of werre by falle, that by necessite
He might algates with wapyns hym defende:
Thus should he lerne in his priorite
His wapyns alle in armes to dispende.